"Lai Thluak, Lai Mit, Lai Thinlung" Perhkalh Ca-uk Zohnak/Comnak

"Internet chungah pakhat le pakhat bia chiachia le holh chiachia in kan i leh tawnmi hna hi catial kan thiam lo nakin carel kan thiam lomi asi deuh rua tiah ka ruah," tiah bia ai danh ciami nihhin a cauk muisam fuapfap in alanghter ko rawh.

Australia ah umhar bik caan hi niruk ni asi ko lai. Lai lei bang i lenkai zong cu um (bator) hlah kaw, innchung le innleng chizawh bang ka hlat tawn ko. Cauk hlun tel seh ka rel tiah ka cauk hrawl bite ka zoh cu, cauk thar salam te aphaw zuk dawh taktak ai suaimi ka hmuh ko. Ka laak! "Lai Thluak, Lai Mit, Lai Thinlung" ti asiko. A tlangtar cu ava puam ve dah ngai tiah, a tialtu ka zoh cu "Perhkalh" (cakei!!!) Kapu Perhkalh nih pei Laimi caah adang tein; mit, thluak le thinlung akan ser piak ko lai hi ka ti pah. (Atlangtar angan tuk le akheng te hnga maw?)

Achung ka kau, ka rel. Mi sawinak le tlamtlin lonak alanghtertu cauk hna alo thulh. Laimi khrihfabu cawlcanghnak, Kawlram ramkhel kong tete le Laimi kan zatlang nun muisam cu (video bang ka hmai ah i piah sehlaw) cu bang, fiang pup fiang pup in a phozar ko. Catialtu hi kum 25 tang hrawng siseh law, "Fa ninghngal te heih si hi," kan ti cio ial lai dah. Zeitlukindah abia pawl ahro kual ti ahcun lawmhpinak catialtu Laimi catial thiam pasarih; Salai Joel Ling (Uisih Tlang Khuabawi Hlun), Lian Chawn, Vapual, Salai Lairamthang, Thlasui Tluangneh, F Lai Len, Stephen Ni Kio le biahmaithi tialtu Richard Zatu nih aral thatnak an fak dih ko. (Anmah hmanh nih an tial ngam lomi si dawh si) 

"Lai Thluak, Lai Mit, Lai Thinglung" cauk hi Lai cauk chuak ka uar bik pakhat asi. Ka uar khunnak cu tlangtar pakhat tangah, teng-nge tete asih hna i tawifiang bikin ahrilhfiah khawh. Cupinah, biafang thar zong ka hmuh. (Catial thiam ka timi cu biafang thar achuah pi/khotu khi). Tahchunhnak: Kha-Lih-Fa (Sullam: Laimi Khrihfa- velhle khrihfa tinak asi). Hawi dang he ai dannak pakhat zong aum fawn. Aphaw! Vapual hi athiamnak sang bik maw ai chuah hnga ti awkin, Laimi ca chuak 'Cauk phaw' lakah ka duh bik asi rih. 

Kapu Perhkalh: ("Perhkalh sullam cu tingtang tum ning phun khat asi," tiah Jolel Ling nih ati.) nih avoikhatnak bik cauk a chuahmi "Lai Thluak, Lai Mit, Lai Thinlung" cauk cu biafang fawite he dawh takin tamhmi cauk asi. Hi cauk nih, Laimi kan zatlang nun, khrihfabu cawlcanghnak muisam kha fiang lakin alanghter. Cucaah, Laimi sining theih le ruahnak hngalh na duh ahcun rel tha bik cauk asi i biafang fawitete ahman caah; kum ri khiah um loin (ngakchia upa) siseh, Laica rel ai hrawt kaa hna nih siseh, biafang dawhdawh azawi fawn caah: Laica thiam hlei a duhmi le Laica tial aduhmi hna nih rel phu cauk asi. 

Nota: Kapu Perhkalh anun khua sau ko seh! Ca-uk tampi kan tial/chuah piak ko seh!