What is salvation?

Ngakchia Theology
Pak Lileng@thawngkhuathang

Khamhnak cu zeidah a si? Khamhnak nih muisam a ngei maw? Khamhnak cu zeitindah kan hmuh khawh lai? Khoi kaa in dah kan co lai? Aho hen a kan khamhtu cu a si kun lai tibantuk pawl... ka rak ruat bal lo.

Ka chuah kaa tein kanu le kapa khrihfa an si ruang ah an biaknak kai hrawm ve. Jesuh nih a ka khamh ti cu tuanbia bantuk asiloah ca bantukin sunday school ah ka cawn i ka theih. Cucaah khamh ka si, vanram ka kai lai tiah kai rak ruat. Asinain, hnangamnak taktak ka ngei lo. Kai pum ve, hla ka sa ve, thla ka cam ve nain thih ding ngaingai ka ruah ah ka nunnak nih a tih tuk! 

Bible hi cutluk cun ka rel lo nain ka ngakchiat tein ka cawn caah ka theih pah. Cucu sualnak a si, khakha sualnak a si caah tuah hlah uh tibantuk pawl timi a tam nain ka tuah kho (zul) hna lo. Cucaah ka ih lai i, hei thi ning law tibantuk pawl ka ruah ah vanram kai ding kai fiang kho tawn lo. Tuksapur vansang in ka um tawn.

Minung nihhin kan theih ko nain kan philh pengmi thil pakhat a um. Chikkhatte ah a parmi pangpar bantuk kan si ti kan hngal tawn lo i kan duh paohin kan sual ngam. Kan thaw kan chuah khawhmi, kan holh khawhmi, kan kal khawhmi, kan tuah khawhmi, kan theih khawhmi, kan hmuh khawhmi le kan ke chek in kan samfa tiang a kan him tertu Pathian kan hngalh tawn lo i that lonak tampi kan tuah chih tawn. 

Mi tampi nih, "Khamhnak cu dinnak in a rami a si lo. Sualnak kan tuah chih zongah laksawng lawng pei kan sungh ko lai cu," tiah an ti. Khamhnak hi dinnak ruangah co cu a si tak lo nain khamhnak a comi minung nihcun sualnak cu hrial an i zuam ko lai.