A Fim Ngaimi Zawngte Le Ngalpi Kong

A hlan lio pi-ah,  Japan ram Shin Shin timi peng ah, zawngte laamter in apaw ai cawnmi pa pakhat arak um. 

Nikhat cu thinhang ngaiin inn ah arak lawi. A nupi nih arak don tikah, sathat pa kha auh dingah a fial. A nupi nihcun khuaruahhar ngaiin, "Zeiruangahdah, sathat pa auh cu na ka fial," tiah a hal. "Hi zawngtar hi zeihmanh santlaihnak angei ti lo. Fung in ka tuk len zongah tha tein alaam kho tilo. Cucaahcun, sathat pa sinah ka zuar lai le tangka tel ka hmu lai!" tiah thinhang ngaiin aleh. 

A nupi cu a ngaihchia ngaingai. A vapa cu zuar lo dingin a nawl lengmang ko nain a vapa nih zei hmanh ah a rel piak lo. 

Cu an i ceihmi kong cu zawngte nih a theih tikah, a ngaihchia ngaingai. "Kum tampi a caah zumh tlak tein rian ka tuan piak. Asinain, dai tein umter le thihter hmanh aka duh lo. Sathat pa sinah zuar i; ka sa can, em-e-em le, ei hna seh ti dah ngai aka duh. Sicun, zeidah ka tuah awk asi. Imm, khualu tupi chungah afim ngaimi 'ngal' sin ahkhan ka va kal lai i bawmh ka va hal lai," tiah a ti. Culecaangka cun, rang taktak in tupi lei ahcun atli.

"Maw atha tukmi ngal, na fimnak cu ka theihnak asau cang. Harnak faak ngai ka ton caah aka bawm khotu cu nangmah lawng na si tiah ka rak in fuh. Sau ngaite ka zulh cangmi ka bawipa nih ka tar ngaingai cang i tha tein ka laam khawh tilo caah, sathat pa sinah zuar aka duh...Cucaah, zeidah ka tuah awk asi?" tiah a hal. 

Zawngte thangthatnak bia nih ngalpi cu alawmhter ngaingai. Cucaah, bawmhnak ding khurkhua a ruat. Sau nawn arauh ahkhin;

"Na bawipa nih fa angei maw," tiah ahal.

"Fapa pakhat te angei," tiah zawngte nihcun ruahchannak tam ngai he khin aleh.

"Ngakchia tecu innka pawngah anu nih achia tawn maw, innchung hnok afim kar ah. Achiah ahcun, anu um lo karah ka rak ra lai i, ngakchiate cu ka tlak pi lai," tiah a ti.

Alu kheuh pah buin, "Cun teh, cun teh," tiah zawngte nihcun ati.

"Khitik i, na bawipa le na bawinu tuah awk theih loin an um lioah ka hnulei in na rak ka dawi lai i naute cu himte in anu le pa sinah na phak pi lai. Cutikah, na bawipa nihcun an zaangfah ko lai," tiah a ti.

Cutikah, zawngte cu ai lawm tuk i ngalpi sinah lawmhnak achim hnu ah innlei ahcun ruahchannak tampi he akir. Thaizing ah, ngalpi chim ning in thil asi lo ahcun sathat pa sinah ka bawipa nih aka zuar cang lai ti aruah ah zan zong ai hngilh kho lo. 

A thaizing ahcun, ngalpi nih achim bantuk tein ngakchiate cu anu nihcun innka pawngte ahcun a hlim i innchung hnok pawl cu afim. Ngakchia te cu ai nuam tuk hringhran. Culioahcun, tih nung ngaimi thawng le ngakchia tah thawng cu anu nih coka in a theih. Rianrang tein ngakchia umnak lei a tlik tik ahcun ngakchiate cu ngalpi nih ai tlik pi ko kha ahmuh. Culecaangka cun, a vapa sinah atli i ava thangh. Avapa he an tlik i an zoh tik ahcun, ngalpi cu aliam dengmang cang. Asinain, ahnu leiin zawngte nihcun atha um ek-in adawi kha an hmuh. 

Caan tlawmpal arauh ahkhin, zawngte nih naute cu him tein arak kir pi kha an hmuh. Cutikah, a nupi nihcun, "Hi maw thah na duhmi cu asi. Amah um hlah sehlaw, na fapa hi kan hmuh ti tung lai lo," tiah lungsi lo ngaiin anpa cu a mawhchiat. Anpa cu ai chir tuk hringhran i, sathat pa arat tikah kirter ding in le, zawngte caah rawl thawte ser piak ding ah annu cu afial.

Cuticun, zawngte cu sathat pa kut in aluat lawng si loin dai tein le nuam tein a bawipa te sin ahcun a um i fung zong in atu tilo. Cuvial...

Note: Japanese Fairy Tales compiled by Yei Theodora Ozaki in 1908. Lehmi