Zeitindah Kan i Lawmh Khawh Lai? (Part-1)

Minung kan nunnak ahhin: kan nun ko ahcun; "lawmhnak" hi a biapi bikmi pakhat a si. Asinain, cu lawmhnak cu mizapi nih kan ngei kho lo. Cawk khawh zong a si lo i a-sii zong a um fawn lo. Mi tampi nih cu lawmhnak cu, chikkhatte caah kan ruah. Annie McKee nih, "Lawmhnak timi cu chikkhatte ca si lo. Hmailei kan nunnak ca tiang ah vai lawmh khi a si," tiah a ti. Asiahcun, zeitindah cu lawmhnak cu kan ngeih khawh lai? Kan zoh tuah lai.

"Lawmhnak cu tinhmi ngeih le rian tha ngaihnak in ai thawk," tiah mifim pawl nih an ti. Ruahchannak a ngeimi sinak zong nih mi a lawmhter ve. Asinain, Laimi tampi cu riantuan lo kan tam hlei ah tinhmi kan ngei lo. Riantha ngeihnak dingah harsatnak pah hmaisa kan ngamh/duh lo i rianrang tein phaisa hmuhnak lam kan kawl. Cunihcun, chikkhatte nuamhnak cu akan pek nain zungzal caah lawmhnak ding lamtu cu a phih. 

A ngaingai tiah cun tangka hi atha tuk. Asinain, a duh zia kan thiam a herh ve. Kan innchungkhar, kan khrihfabu, kan miphun nakin le kan Pathian nakin kan duh balte ahcun virus tih nung taktak a si. Zeicahtiah, kha phen ah aa zulmi hna cu; mibu sinah i tel khawh lonak, khrihfabu chungah i tlum lonak, innchung khar he i thennak le thlarau lei ah thihnak tibantuk pawl an si. Cunihcun, lawmhnak lam vialte a chah hna. 

Laimi nih kan i palh tuk tiah ka ruahmi cu, "Siifak te si zongah Pathian he cun i lawmh khawh tuk siko," tiah kan ruahmi hi a si. Lawmhnak timi hi a tlangpi in phunthum in then a si. Taksa lawmhnak, thinlung lawmhnak le thlarau lawmhnak tiin. Cu hna pathum tlingte kan tinco lawng ah lawmhnak tling taktak cu a si hnga. 

Adonghnak ah, kanmah le kanmah bia i hal hna usih! Zeiruangahdah, kai lawmh khawh hnga lo? Atu ka dirhmun hi lawmhnak taktak a si maw? Kan bia lehnak ai dang cio lai. Asinain, lawmhnak kan ngeih khawhnak dingah kan zulh dingmi lam cu ai khat ko. Taksa kan i lawmh khawhnak dingah, fimnak kan kawl lai. (Riantha kan tlai lai). Thinlung kan i lawmh khawhnak dingah; innchungkhar, khrihfabu, zatlang bu hna le miphun chungah caan pek khawh kan i zuam lai. Ruahchannak kan ngei lai. Cun, kan thlarau lawmhnak caah thla kan cam a herh. 

Cu hna pathum kan tuah ahcun ai lawmmi kan si ko lai!!!

And always think positive!