Paih nih Miphun Ni A Hrawk Lai Maw?

Kum fatin Miphun Ni lai ah buai ngaimi cu Paih kong ah a si. Tukum zong ai dang hlei lo. Kan facebook kan on bakin notification le kan timeline ah paih kong ah buai lulh cio a si. Paih lawngte an buainak nihhin Miphun Ni a philhter te sual hna lai ti a phangmi an tam. A hlei in a chuakte ding kan fa le nih Miphun Ni hi Paih Ni ti hna ah an thleng sualte hnga maw ti tiang a ruatmi zong an um. Asinain, Paih nihhin Miphun Ni cu a thlau kho ngai hnga maw? Kan zoh tuah lai.

A luancia kum 100 kan kir ahcun Laimi nih Paih hi sunhsak ngaimi nunphunng pakhat a si ti kan hmuh khawh. Meiphu kulhmi laikher ah Khual le Lai hawikomhnak ah paih arak si tawn. Cuticun, zupu an dap pah, an i pai pah, biasawng an tlorh pah, hla an i hlawr pah, tiin nuam ngaiin an rak um tawn theo. Asinain, kum le caan a kal bang chan sining ai thlen tuk tikah kan nunphung a simi Paih tlawm tete in a tlau ziahmah. Paih thiamnak ah hmanmi, to-vawr, khel cung puak, vangkau, thachumngerh...tibantuk, tampi zong thlau le philh an si. Cutikah, kanpa le cheukhat nih nunphung thlau le thiamnak thlau an duh lo caah a luancia kum 5 ri in Paih rumra ngei deuh ngai in an vun cawisan than. Cuticun, a hung thangcho ngai i tuni ahcun Laimi nih kan zoh duh bikmi le a langsar bikmi ah a hung cang. 

Laimi theo. Thancho kan itimh ahhin kan kong kan iceih, kan chiatnak kan i hmuh piak. Kan i soi. Zeihmanh tuah loin, to hmun in kan zai hnawh hna. A ngaingai ti ahcun, Lai paih hi Miphun Ni ah tuah hna hlah sehlaw Miphun Ni hi minung tam nih kan hmang ti ngai hnga maw? Minung um lonak ah tuahmi thil cu pakpalawng a si ko. Cucaahcun, Lai Paih nihhin Miphun nih a tlauter lai lo. Minung tampi tu a komh hna lai. Minung tampi tu a cawisan hna lai. Cun, kan nunphung a simi in mi sin ah kan hmai hngalnak le vawlei pi nih theih pimi lentecelhnak tiang hmanh ah a chuak kho. 

So, times up! Holh lo tein tanpi ko hna usioh! Dai tein cawisang ko hna usioh! Kan Lai Paih hi vawlei pi nih a theih tiang in thape ko hna usioh.