Zeitindah Rel Awk Tlak Lo Chin Media Kan Zorter Lai?

Pak Lileng@thawngkhuathang

A luan cia kum 5 lio ahcun Laimi nih social media ah kan ngeihmi thawngpang relnak websites asiloah blogs, pages le group hi kut caang rel khawh zat te a si. A bu in rian an tuan hlei ah, an thawngpang tial ning le an rian ipek ning pawl a that caah rel awk tlak le mipi caah hmanrua le bawmtu tha taktak an si. Asinain, tuni ahcun rel cawk lo pages, websites, blogs le groups pawl pumpak nih kan ngei (tuah) cio cang hna. Kam khat leicun fim thiamnak kan thangcho ti khawh a si nain, mipi lung a buai tertu le mi lungthin a hrawktu thawngpang chiahru tampi zong a um ve caah hmailei kan miphun cungah a chia ngaingai mi thil a chuahter khotu zong a si ve.

Ka hawipa nih a timi cu, "Horduhcuainak thawngpang tial riangmang in tangka kawl cu arnu he an idannak a um lo," tiah a ti. Thuk deuhin ruah setmat ahcun thil dik ngai a si. Kanmah tangka hmuhnak men lawnglawng ruatin mipi caah chiatnak a chuah tertu rungrul kan silo a biapi ngaingai. Tuchan ahcun ngakchia (underages) pawl zong nih duh tawkin facebook hman le tongh a si tikah, kan tialmi cabia le thawngpang nihhin kan nau le ngakchia pawl ruahnak kan hrawk sual hna lai ti phan awk ngaingai a si. Cun, thawngpang maw thawngpang lo ti tel hi cu thawngpang tialtu nih kan theih ahcun a tha tuk hnga. (Kan theih lo caah :P )

Chinmi hi kan mahnak a tam tuk. Asinain, kan mahnak pawl hi a dik lo lei a tam ngaite le lungrawk cu si ve. Vawlei cung miphun lakah comment in bia ai al bik hi Chin miphun kan si ko lai. 100% ah 499% in ka lungtling. Kan biafang chiachia in kan ichep. Ek sisehlaw ek sawh zong si la loh. Anam khun lai. Cu bia alnak a chuah tertu zong cu ahohlei va sihlah, kan media theo an si hoi. An thiam ngai ve. Tangka cu an hmu meisei lai. (Kan milu tlawm rup in) ceep!

Laimi nih phungthluk kan ngeihmi, "A hrut nih fim chimh," timi kha kan hluan ko rawh. Kan ning zong zah pah ding si. Kan hmuhmi tangka hi a thiang hlimmi lam in kan hmuh lo ahcun chikkhatte ah a lo ko lai ti kan theih ahau. Thawngpang asilomi thawngpang (horduhcuainak), lih fangfak rumro tawnmi thawngpang, BC chan ah rak tial cangmi thawngpang hna leh i atu bantuk ah a cangmi in tial tibantuk pawl kan hman (ti) lo awk a si. Kan websites, blogs, groups, pages min khenh zong hi kan ninghngal tuk! I remh kan hau ko :( 

A donghnak bikah, mipi zong fim khur tein um kan hau ve. Cabia kan rel tikah, rel awk tlak a silomi cabia cu lanh tak ko hna usioh! Thawngpang kan rel tikah rel awk tlak a si lo ahcun zoh lo ko hna usih! Cuti kan tuah ahcun, rel awk tlak lo media cu a zor chuak ko lai.

Nota: Pumpak in ti hnawhmi zeihmanh a um lo.