Zaanmang Mitthli

Pak Lileng@thawngkhuathang

"Thleng lo tein kum 4 kan duh cang. Asinain, na rak ka al peng. Atu na lung an thlengtu na ka chim kho maw?" tiah inuam nain lungsi lo nawnin ka hal. A tlai ri lo, suimilam 9 pm a si. Fawi tein a aanpau lo.

"Jay, zeiruangahdah kan al ticu aruang aum. Asinain, ka thinlung biakhiahnak ai thlen ding cu ka ruat bal ve lo. Kan duh ve tthannak aruang ka hngal lo. Dawtnak cu fianh khawh silo na ti lo maw, huh!"
Keimah bia lila in a ka phih! Asinain, a ruang a um lai ticu ka zumh ko. Zeiruangah ti zong hngalh a si fawn ko. Asinain, a mirh ka zoh sin kaa lawm tuk thiam ko.

 
Rak ka hnam ti ahau lo. Na ka duh maw ti hal zong ahau lo. Voi tampi aka hnamh. Nolh lengmang in kan duh aka ti. A ngaingai ti ahcun ttah thluahmah khi ka duh nain ahmai kaa ah ka mitthli tlaakter ka duh lo. Ka dawt tuk.

"Hmaizarh leicun na ka kal taak cang lai ti, kan ngai tuk lai, ka thi lai. Na kal dingmi hi ka saduhthah asi ikan duh piakmi zong asi. Asinain kal ni an hun in thanh taktak hin cun kan siang lo. Kan thlah siang lo. Man na ngei chin lengmang," ti zong mitthli he chim khi ka duh. Nain asia arem sual lai lo ti ka phaang. A ka duh zong hi, saupi aa kom cangmi hawikom pahnih kar lakah a rak tuahmi lungfahnak pawl kha maw a thinlung  mitchinh buin nuamhter (cham) a ka timh i a si hnga.

     Asinain asin-in ka duh bikmi thil ka ngah caah kai lungsak. Ka sunsak bikmi a thinlung, athlum tukmi a aanthlum, a hninghno bikmi ahmur ka tinco caah kaa lungsi tuk. Atak lo mang hmanh khi hei siseh law!