Hling Lakah Atlami Rose Nak!

Then 1Nk

        Zinglei suimilam 6:00 a.m tluk hrawng a si. Ihnak cung ah athli tein a ik thluah mah! Nau aa tthang sual lai ti aphaan caah akut in a kaa aa phih! Asinain, ngaihchiatnak angan tuk caah kham awk a tha lo. "Nu, zeitin! Zeidah a cang?" tiah aa tthangmi naute nih a hun hal. "Dawt, zeihmanh a si lo. Mitkuh thaw tein it mu. Thaizing sianginn na kai kho sual lai lo," tiah a thli tein a mitthli aa hnawh pah khin ahun leh. "Nu, ttap ti hlah mu," tiah a fanu nih a biang cung mitthli a hnawh piak pah khin ahun hnemh. Sui Sui a celh lo. A fanu te a zoh ah a tuarzia a thiam lo. A ttaang ah a beek chih bu khin, 'ka ngaihthiam' tiah a cal ah mitthli tla bu in a hnamh chih!

A luancia kum 6 lio ah...

       Inn khan pakhat chungah dawtnak nih ahrenmi hna, Sui Sui le Lian Lian, muihnak nih a tuam hna caah khua an hmu kho lo. "Sui, kan dawt tuk!" timi bia pakhat nih a zelhmi thinlung, zeihmanh a lung chungah a um kho ti lo. Hmailei caan ah a ra dingmi thil pawl. Zei lam dah an zulhmi lam a si timi a hmu kho lo. Lian Lian hi Sui Sui naakin kum khat in a ngakchia. Sui Sui kum 19 a tlinnak chuah lawmh zaan a si. Lian Lian ramdang ah a kal lainak zaan dongh zaan zong a si. Cu zaan cu, a senmi Rose anah zaan zong a si.

---------------------------------------------------------------------------------------------------

Then hnihnak

       Dipa thla 25 a si. Lamkam ah a ceumi meitung tete, vur nih pen nawn tete in a khuh hna. Daihnak nih a tuammi khua chung ah, fahnak in a khatmi Sui Sui, anau nganfah a celh lo. "Kanu ka celh lo, ka thi lai! A faak tuk! Lian, ka tta na kut rak ka chaan tiah mitthli tla buin a au." "Nute, nusal tilaw," tiah anu nih akut ahun hmeh chih buin thazaang a hun pek. Fa khatnak ngeih a si caah a nganfah a celh lo. A ngo tukmi a taksa, aa sen tuk naak ah a duk dih! Anu le apa um zia an thiam lo. "Nusal!" tiah avun ti vial ahkhin, naute a hung ttah thawng a thang. "Nute a si!" tiah an hun ti. Sui Sui cu a tha a dih tuk caah, amit aa au kho ti lo.

        Sui Sui nih a fate cu, "Ngun Fidi Par" tiah a min ai sak. Lian Lian nih a chawnh tawn hna ah an nu fa in an mitthli tla tawn. Zeitikahdah kan iton te lai ti an ruah ko ah an celh lo. Zaan fatin Pathian sinah khukbil in thla an cam tawn. Cuticun nithla ahung liam lengmang i kum thum tluk a ti cang. Asinain, Lian Lian sin kalnak an tuahmi a tlamtling kho bal lo. Cutikah Lian Lian a umtu ai thleng ngaingai. Ni khat voikhat a chawnh tawnmi hna, thla khat ah voithum hmanh a chawnh lo hna caan a tam cang. Dawtnak hri in sermi biakamnak, tlawm tete in a catmi bantuk a lo cang. Lian Lian cu muidawh, pumruatha a si hlei ah, ngakchia te a si rih caah nu tampi nih an zelh lai ticu Sui Sui nih a theih tuk. Asinain, dawtnak ah a mitcaw tukmi Sui Sui thinlung ah zumhnak le dawtnak dah tilo, zeihmanh ahmu kho lo. Sihmanhsehlaw, dawtnak in sermi vawlei bite ah dawtnak thlitu atlawm tuk tikah athaw chuah a har.

         Atlai cang caah amui. Zinglei suimilaam 5 a.m tluk a si cang. Ruah lo piin Sui Sui phone a hung ring. "Lian" ti a si ko. Mithla hmumi abar ko. Second hnir khat hmanh dawtmi he hman lomi caan cu akum tluk va sikaw, a zarh tluk aa chawn ti lomi Sui Sui le Lian Lian, dawtnak in akhatmi Sui Sui hi a mawh lo. zei bia hmanh a chim lo. "Lian, kan in ngai tuk!" tiah a aw hno bu khin din tein a au. "Aw! Nan dam hnga maw tiah chikkhatte phone ka hun in chawnh ta hna bia a si. Class ah ka um le kan ichawn tthan te hna lai mu. Nan nih lei zong a tlai cang. Mangttha uh law," tiah ati vial ah... aw a dai cang. "Lian! Lian! Lian!" tiah a ti pah ah Ngun Fidi Par biang cungah atlami tidor ahun itongh hnu lawngah, a biangno cung mitthli asi a hun theih.

---------------------------------------------------------------------------------------------------

Then thumnak

      Thlapa lai zaan a si. Tialku chuahni lawmh zaan a si caah Lian Lian zong a sawm ve. Tialku le Lian Lian cu sianginn kai ti khat an si hlei ah hawikom zong an si fawn. A tlai ri lo. Suimilam 9 pm tluk a si. Dandenong tlang ah Tialku le a hawi le cu BBQ an rawh hna. Melbourne thli a si caah a kik hringhran. Thlapa lai zaan a si caah, thlapa vaang to pahin pakhat le pakhat a khuahkhuah in an ilumh hna. Asinain, Lian Lian cu amah te lawng a to ko.
        "Lian, a nuam lomi na lo," tiah Tialku nih a keng ah din tein a bengh pah in a pawng ah a to. "Kaa nuam ko. Mahtluk ai dawhmi zaan ahhin nuam locun ka um kho maw i?" tiah mirh nawn in a leh. Thlizil a pen tuk caah an kar lakah a chah tukmi i dannak nih an khua a sihter ngaingai hna. "Lian, zaan lawng maw ai dawh?" tiah Tialku nih aw din deuh tein Lian mit zoh bu tein a halmi nih a thinlung a turter. A ruah ciami thil a si ko nain Tialku aidi thawng tukmi tannak ding ah thazang a rak der suaumau. Varal a pet kho ve lo. "Nangmah tluk cun ai dawh lo hen ta," tiah zoh bu tein a lehmi nih thil sining a thlenter.
           Caan a tlai vima caah khuasihnak ai chap vima. Kihnak nih a sermi dawtnak, Lian nih fum tein a tlaihmi kut, zeitik hmanhah a thlah ti lo ding bang.