Siam Cakuat

Pak Lileng@thawngkhuathang

I

Na duh bikmi hla kan rak ngeih ti ahkhan

Na kut tlaih khawhnak nawl ka rak ngei.

Kan dawt tuk kan ti ahkhan

Na thinlung voikhat tel ka turter hmanh maw?

Na nu, na pa, na u, na nau le nangmah

Nan lungtlin mi, nan thimmi

Nan dawt dingmi

Nan upat dingmi pa

Ziah hen, ka si khawh lo (?) 

II 

Dawtnak ah ka rum bik ko lo maw, huh!

An daw biktu ka si lo maw?

Thennak lam thong um hmanh ah,

Dawtnak lam khat te'n then khawh siang lotu

Biathli lak ah ai telmi biafang

Phuan an si lio zongah,

Na rak mirh ko.

Ziahhen, ruahchannak tlawmte hmanh ka ngeih kun lo?

Thlapa hmanh a de nai cang

Arfi hna zong an til cang

Mitthli  cu an tla ri ko lai maw?

III

Spring ai naih tliahmah cang

Thinghnah hna nih na zuun an zawi bang

Thinghnah tilh caan ah, kan hlam te ding

Ruahpi sur caan ah, kan ngaihte ding

Ngaihchiatnak khamtu nithawng ka chan law.

IV

Na biang hnamh caan ka ngeih ahcun,

Mang a si lai a fiang.

A tak ahcun, na mirh fang hmanh ka co khawh lo

Ralkap bu ning an congh bang,

Sal ka si.

V

Na ke hram te ah dawtnak kut ka dok

Fang khatte hmanh an sung dakaw,

Na zaang ka faak hin lo maw, huh!

Na zaa hun zo law!

Nuamhnak pangpar paar seh!