Australia Ramkek Kong Theihtlei Tawi

Australia ramkek pawl cu Aboriginal ti ah an auh hna i,  Africa in a rak tummi an si. A luancia kum thong tampi ah Asia tan pah thluahmah in chan tampi hnu ah a rak phanmi an si. Hlathlaitu hna zumh ning ahcun Australia ah kum 40000 in 70000 kar an um cang tiah an ruah.

Torres Strait Islander minung pawl zong hi ramkekmi an si ve i Island pahnih kar lak Far North Queensland le Papua New Guinea in a rami an si. Hlathlaitu hna nih aluancia kum 700000 lio ah Indonesia ram in arak rami an si lai tiah an zumh hna. Cucaah Papua New Guinea cu tu ni tiang Australia he ai pehtlaihnak a si.

Avoikhatnak bik Mirang an rak rat lio 1788 ah, ramkekmi Aboriginal le Torres Strait Islander hna hi Australia ah minung 750000 tluk an rak um cang. Hmun khat pi ah um si loin chungkhar-hrambunh in an rak um hna. Phu pakhat nih mah holh le mah nunphung te an rak ngei i cuticun khua an rak sa. Asinain, Mirang pawl an rak rat tikah thil tampi ai thleng. Ramkekmi tampi nih an vawlei, an nunphung le an nunnak tampi an rak sung.

Ramkekmi pawl hna nihhin holh phun ngan 250 le holh phun hme 600 nak tam an rak ngeih. Asinain tuni ahcun holh phun 145 tluk lawng a taang cang. Cun, 110 tluk hi minung tlawmte lawng nih an chim khawh cang caah atlau dengmang cang. Hi vialte a cannak cu, cozah nih ramkekmi ngakchia hna an chungkhar sin in hramhram in a rak laak hna ruangah a si. Anmah Mirang nunphung in nunter le zohkhenh an duh hna caah an rak fir hna i cucu chan fir tiah an auh. Cucaah, an holh le an ca an chimh khawh hna lo tikah le tial an si lo tikah an nunphung tampi hna le an ca hna cu an tlau riahmah cang. Cu chan fir cu tuni tiang ah ramkekmi hna nih an ngaihchiat bikmi le Australia tuanbia ah ningzak bik a si.

Mirang holh cheukhat le Ramkekmi Kriol holh cheukhat zohchunhnak

Mirang	Ramkek
Horse	os
American	Meriken
Anyway	eniwei
Footpath	putpat
A man with money	manimen
rainforest	janggul
Many people	bigmob
fear	frait
refrigerator	frisa

Nota: First Australians (Go Facst) chungin